今年世界盃六月就殺到嚟，以往唔少立法會議員都會放假飛去外地睇波，但今屆世界盃主辦國移師到南美巴西，加上當地嘅治安出名差，連工業界議員林大輝呢位專業球迷都話為安全起見，寧願睇電視直播捧愛隊好過喇！

林大輝最擔心立法會「拉布」戰持續，所以放棄遠赴巴西睇世界盃。（資料圖片）

曾經做過本地波班主嘅大輝話本來都幾有興趣去巴西睇波，但自從有唔少朋友話巴西治安唔係太好，連遊客接受緊電視台訪問時都被搶嘢時，即刻打退堂鼓。不過，佢話最擔心唔係治安，而係立會審議預算案「拉布」戰到六月都好可能未完結，作為議員又點可以因為睇波而走咗去呢？所以佢寧願揀喺屋企睇波算嘞。

雖然唔去巴西睇波，但唔代表佢唔緊張。佢上屆睇好西班牙，因隊中有唔少至愛球星，但今屆佢就「移情別戀」捧巴西，事關巴西人強馬壯，又係主辦國，天時、地利、人和乜都有，點會唔贏呀。上屆佢眼光好準，貼中西班牙捧盃，今次巴西隊有佢嘅「祝福」，唔知會唔會順利奪冠呢？　

第一手消息請下載on.cc東網iPhone/iPad/Android/Windows Phone Apps