港交所行政總裁李小加搞掂咗「滬港通」呢單大嘢，再加埋其他工作，呢排頻頻出嚟見記者，尋日又風騷上陣，同民生銀行簽合作備忘錄，仲好蝦碌簽錯位，大呼「簽錯了!」不過，冇有怕，可以好似拍戲咁，take two啦，佢呢鋪蝦碌嘢，引來台下陣陣笑聲。

李小加（右）好風騷，完全唔擔心新商品合約交易量細。

備忘錄簽錯位唔緊要，最緊要同民行合作嘅平台唔好搞錯。小加總裁話民行主要服務中小企同民企，呢啲客戶嘅對沖方法唔多，合作平台可以提供相關嘅產品同教育推廣。

依家內地有資本進出限制，民企實際喺港交所點對沖都暫時未知，但小加自信滿滿，話未來民企有可能喺香港平台用到國際期貨工具，依家算係邁出第一步，到時「水多了，魚就多了」，一啲都唔擔心交易量細。

今個星期世界各地參與商品買賣嘅機構都聚首一堂，嚟晒香港，身為主人家嘅小加滿場飛，連民行副董事兼行長洪崎都指佢係大忙人。不過，相信一切都忙得有價值嘅，好似港交所前日宣布今年內推嘅四隻商品合約，小加一早了解晒行情，話「內地企業肯定有興趣買」，睇嚟已經收到唔少好評！

第一手消息請下載on.cc東網iPhone/iPad/Android/Windows Phone Apps