政壇：亂呻選舉例 一舊雲（火羅）爆

面懵懵唔敢再出聲

話說一舊雲喺會上又再亂問問題，質疑選舉事務處漠視社交媒體發展趨勢，仲要求候選人每日以書面形式提交選舉廣告，點知總選舉事務主任李柏康就「提醒」一舊雲，話選舉事務處一早已經更改有關規定，容許候選人以超連結方式提交選舉廣告，毋須將所有廣告列印出嚟，搞到一舊雲面懵懵唔敢再出聲。嗱！自己未搞清楚就亂噏，（火羅）爆！

跟住進出口界嘅議員黃定光話自己喺○八年自動當選後，按規定要喺當選後三十日內向選舉事務處提交選舉開支，但佢所屬嘅政黨就好遲先搞造勢大會，搞到佢喺限期後先知道自己要負擔幾多開支，最後更加要向法庭提出選舉呈請修訂開支報告，前前後後使多成四萬幾蚊。

另一名議員葉劉淑儀就批評，選舉事務處要求候選人將剩餘選舉收入捐畀慈善機構嘅安排，佢話選舉事務處要求佢哋喺短時間內將錢捐畀慈善機構，但有時候選人根本冇咁快計到所有選舉開支，搞到有時捐錯錢。

佢建議選舉事務處放寬規定，等佢哋唔使成日擔心因為報少幾蚊，而被廉署請佢哋去飲咖啡。葉劉之後又乘機投訴現時嘅選舉上限太低，建議選舉事務處根據通脹同印刷費調整選舉上限，又寸爆一眾官員「你未選過唔知人哋好辛苦！」

政制及內地事務局副秘書長梁松泰解釋，現有法例容許當選人就輕微錯漏以行政方式及時修正，至於有議員建議當局延長申報時限，政府會繼續研究同聽取各界意見。