單車爭崩頭 西九亂悠遊
自從香港出咗黃金寶同李慧詩兩位「車神」後，單車熱潮方興未艾，港府固然「忽然」重視體育，西九文化區管理局亦唔執輸，推出「悠遊西九」自助式單車租用系統。本來呢，順應潮流又好，方便市民又好，或者提倡環保又好，呢個構思確實係唔錯嘅，弊在成個系統唔湯唔水，甩甩漏漏，結果搞到七國咁亂，悠遊西九變成忽悠市民。
件事係咁嘅，西九管理局日前正式推出單車租車系統，交由東華三院轄下一家社企管理，以時租二十元提供租車服務，畀市民喺西九海濱長廊享受踩單車及天倫之樂，仲可以欣賞維港美景添，出發點無疑係好嘅，可惜由於單車數量太少，復活節假期首日就出現逼爆嘅場面，好多人苦苦等候，怨聲載道。當局聲稱已經比平日增加十架成人單車及新增小童單車喎，其實計計埋埋只有八十架咁大把，相對於假期嘅人潮，簡直杯水車薪，有乜可能唔爭崩頭吖。呢，唔少人等咗個半小時仲未租到單車，乘興而來，敗興而返，唔谷氣就假。
好嘞，就算幾經辛苦租到單車，都未必係好事o架。正如有人話齋，西九單車徑只得三米闊，而且經常被行人佔用，搞到人車爭路，險象環生，隨時出事o架。仲有吖，有市民投訴，單車徑全長只有一點八公里，眨吓眼就踩完，時租二十元唔划算，以後未必會再嚟喎。
其實，「悠遊西九」今年二月試行時已收到好多意見，有人早就指出單車太少、車路太窄等問題，當局話就話作出改善，點知原來係大隻講，意見接受，態度照舊，問你服未。「悠遊西九」好事變壞事，正如盛事基金變醜事基金一樣，港產官僚永遠都係食嘢唔做嘢，做嘢打爛嘢，大家見怪不怪咯！
講開又講吖，單車遊既有益健康又環保，早就成為世界旅遊潮流，歐美國家流行已久，日本、南韓、台灣等鄰近地區亦大行其道，唯獨香港搞來搞去都不成氣候，真係令人感到無奈。港府聲稱要打造一條超級單車徑，環繞成個新界，將來可以由上水踩到去屯門喎，可惜講到依家仲係無影無蹤。其實，唔好話新界嘅超級單車徑吖，淨係港島及九龍嘅海濱單車徑都未搞得掂喇，家陣嘅所謂單車徑好似斷橛禾蟲咁，踩踩吓就被迫踩出馬路，簡直搵命博，唔怪得年年都發生咁多單車意外喇。
所以話，港產官僚志大才疏，講就天下無敵，做就有心無力，連西九單車遊都搞到一鑊泡，旨意佢哋打造超級單車徑，盞嘥氣嘅咋，叮！
