SUN搞作：網絡小說：港男講女

「活在童話，最多都係幻想做灰姑娘，最慘係活在星星，你做男朋友先慘呀！」賢仔苦瓜乾面口，已經公布佢同居生活有幾悲慘。「好似上次黑雨咁，女朋友變落湯雞返嚟，我即刻搵條毛巾畀佢抹啦，佢就大嗌大叫，「毛巾我夠識拎啦，真係錫我就應該時間停頓嚟救我！」我心諗，我識時間停頓，仲使要你咩，你話係咪吹脹！」

早早成婚有對仔女嘅阿風，聽完兩位嘅憤恨之言，嘆息道：「港女就活在童話嫁唔出，我哋港男呢？咪一樣活在童話，只不過係結婚前之嘛！女友變老婆，十足天使變惡魔，我依家直情活在地獄呀！」阿風撫弄着臂上瘀痕，回想起冇聽電話嘅後果，慌得腳震。