SUN奇古怪：SUN潮語：【萬能Key】
潮語「萬能Key」嘅意思，係指有啲圖片或影片，可以好容易改成其他意思，即係無論放乜落去都得，亦都被網民廣泛採用。「Key」嘅意思其實唔係音樂嘅Key，而係「Key」圖或者「Key」字幕咁解，亦即係用設計軟件如Photoshop作出修改。經典例子係北韓領袖金正恩嘅官方圖片，香港甚至全世界都出現過好多唔同嘅改圖版本，有啲係恥笑金正恩，有啲係用金正恩去恥笑別人好似金正恩咁低智能。
政府一直想透過修訂版權條例，表面上係打擊網上侵權行為，不過有網民擔心，呢條法例係用嚟打擊網上二次創作，甚至係收緊網絡上嘅言論自由。查實無論香港或者海外，網上惡搞一啲圖片及影片，已經成為網絡文化一部分。隨時隨地一張普通嘅新聞圖片，都可以被改成二次創作，其目的純粹都係搞吓笑，或者玩吓，幽他人一默，實質無傷大雅。有時一幅平平無奇嘅圖，經網民改一改，即刻變成一張搞笑圖片而被瘋傳。當然，有時係真係會令當事人情緒受困擾，甚至影響前途。不過有時網上面有啲圖，真係可以稱為「萬能Key」，可玩同可改性甚高，唔改真係對唔住自己。尤其係依家facebook新增咗圖片留言功能，一張改圖有時真係勝過千言萬語！
「萬能Key」除咗指網上改圖之外，亦有另外一個意思，就係用嚟形容一首歌曲嘅Key，可以人人都唱到，好多賑災籌款大合唱，啲Key都係「萬能Key」，即係人人都入到唱到。講開「萬能Key」有另一個經典影片例子，就係電影《希特拉最後十二夜》之中，飾演希特拉嘅演員，喺柏林地下雕堡，面對兵敗如山倒，蘇聯軍隊已經兵臨城下，佢同納粹最後將領同親信開會，企圖反攻，仲幻想自己嘅大軍仲健在，結果有將領將實情告知元首，然後希特拉崩潰咗，仲發癲鬧人。呢段戲大大話話被全球改咗上千次，大家只係改下面段字幕，就變成希特拉發表不同言論。「萬能Key」嘅圖，近幾年愈嚟愈多。有時甚至懷疑影相嘅人，根本係有心整啲「萬能Key」相，玩人。
