政壇：莊家彬七歲與茅台結緣
內地吹節儉風，茅台酒價錢過去一年大跌三至四成，香港國酒茅台之友協會副會長吳永嘉（Jimmy）與青委會主任莊家彬（Albert）都加入搶購行列。早前我哋去過觀塘嘅茅台之友協會，一行入去就有酒香撲鼻，百幾箱茅台，十足私人酒窖，Jimmy話倉內呢批酒係因為某會員家中大裝修，暫時寄存喺會內。現場有唔少限量版珍藏，包括茅台酒廠為上海世博會出產嘅囍字茅台等，原來呢啲限量版靚酒只供喺協會作展示推廣之用。
莊家彬日日收到朋友訂酒短訊，笑言變咗茅台Sales。
吳永嘉展示協會珍藏嘅限量版茅台，有錢都買唔到。
Albert自爆七歲已飲第一杯茅台，當時佢陪爸爸出差，好奇之下連飲七杯，自此與茅台酒結下不解之緣，依家佢可以獨自飲晒一支一斤裝茅台。佢透露，有朋友鍾意將冬蟲草浸喺茅台酒，又或者加入糯米飯或魚翅嚟食，Albert就覺得酒精濃烈度十足嘅茅台，與雞尾酒最夾，口感既複雜又有趣。
Jimmy話，五月將邀請茅台酒廠專家到港，講解釀酒竅門及如何品嘗茅台獨有嘅「醬香」，年尾再帶隊考察貴州茅台酒廠。唔講唔知，愈來愈多駐港領事加入茅台行列，聽聞除咗韓國及日本領事外，英國同俄羅斯等領事，飲完都話頂呱呱喎。
