政壇：內地豪客棄港遊歐
內地居民以個人遊身份到港旅行的計劃推出後，本地零售及服務業受惠不淺，不過激進團體早排一再發起「驅蝗行動」，仲喺旅遊區公然指罵旅客，呢類失禮行動後遺症不少，近日本地零售界就發現，內地富有一族有棄港而去嘅現象，從事鐘錶及時裝生意嘅保良局總理陳正欣（Daniel）大嘆「驅蝗」行為趕客，嚇怕內地消費力強勁嘅富人，零售業亦因此受累，近半年嘅營業額普遍下跌兩至三成。
設計圖片及對白
降入口稅 內地買錶平咗
新春假期後首個旅遊高峰、五一長假期將至，零售界關注內地旅客來港消費情況會唔會進一步轉變。Daniel話佢收到唔少內地客反映，表示唔願再來香港購物，免得貼錢買難受，寧願去歐洲使錢。除此之外，香港購物天堂地位亦受到挑戰，事關以前喺內地買外國錶確係好貴，但去年內地大幅調降瑞士入口腕錶稅項之後，依家喺內地買錶唔再貴過香港好多，內地人諗真啲，未必願意山長水遠嚟香港購物。
內地旅客訪港本來係好事，但部分地區出現水貨客滋擾問題，又有人藉此炒作中港矛盾，搞到衝突升級。Daniel坦言，本港商舖租金仍然高企，經營成本百上加斤，若港人盲目鼓吹「驅蝗」，只會打擊香港消費市道，對老闆及打工仔有害無益。
