港府嫌貧愛富，對窮人一毛不拔，對權貴疏爽大方，早就唔係新聞。最令人嘆為觀止嘅係，當局以賤價批出地皮畀私人會所俱樂部，本來已經備受非議，估唔到仲要慷納稅人之慨，連私人會所嘅維修費都包埋，都可算呵護備至咯！

話說位於九龍京士柏黃金地段嘅文康市政職員遊樂會，其禮堂屬於三級歷史建築，該會最近透過政府嘅歷史建築維修資助計劃，獲批九十九萬元作修葺之用。私人會所以超筍價租用市區靚地，原本已經好着數o架啦，照計有權利就有義務，維修費用應該自己搞掂，依家居然由公帑埋單，簡直當納稅人係羊牯，有冇離譜啲呀？

文物保育專員辦事處話喎，佢哋既唔會考慮物業地皮以何種方式批出，亦唔會考慮業主有冇財政能力。咁即係話，只要係歷史建築，億萬富翁申請維修資助一樣照批，呢啲究竟係乜嘢條例吖？邊個規定o架?

立法會議員就講得啱嘞，私人俱樂部會費隨時幾十萬甚至幾百萬一年，政府畀錢佢哋維修翻新，絕對係亂用公帑，浪費納稅人金錢。不可不知，除咗呢個會所之外，全港起碼仲有六個私人會所可申請歷史建築維修資助，其中包括粉嶺哥爾夫球會、西洋波會、香港遊艇會等等，會員非富則貴，反而要由納稅人資助佢哋維修，簡直豈有此理！

話時話，港府本末倒置，為私人會所錦上添花，大家早就見怪不怪咯。好似渣甸山居民協會咁吖，賤價租用估值五十億元嘅十三萬平方呎靚地，當中包括二萬多呎斜坡，當局十五年前發出修葺令，點知協會睬你都傻，一拖再拖之下，六百幾萬元維修費卒之咪由政府埋單囉。你話嘞，政府送完雞再送豉油，係咪搵納稅人笨先？

講開又講，香港寸金尺土，市區土地買少見少，呢類會所往往只服務一千幾百個會員，但長期霸住靚地，已經係資源錯配，加上當局監管不力，搞到七國咁亂。審計報告曾踢爆，唔少私人會所淪為生財工具，開設燒烤場、按摩房、婚宴場地、酒吧甚至麻雀館等，無奇不有，烏煙瘴氣。照計政府就算唔收番土地，起碼都要加強監管，可惜當局翹埋雙手闊佬懶理，有咩辦法唔七國咁亂吖。

開講有話，「人盡其才，地盡其利」，喺房屋問題不斷惡化嘅今日，政府早應該收回私人會所用地，起公屋又好，起私樓又好，總之唔可以任得會所生人霸靚地，如果唔係，盞激起民怨嘅咋，叮！

第一手消息請下載on.cc東網iPhone/iPad/Android/Windows Phone Apps