每年嘅香港電影金像獎，都算係一件大眾關心嘅盛事。雖然東方荷里活、曾年產三百部戲嘅香港今日風光不再，但可幸星光依然，好多香港以至大陸嘅大明星都會捧場出席。當年好多港產片嘅演員，今日都已經躋身國際影星之列。香港導演例如王家衛、吳宇森呢啲，藝術水平亦都早已獲得國際肯定。今屆嘅大贏家係屬於王家衛導演、梁朝偉同章子怡主演嘅《一代宗師》，呢部戲橫掃包括「最佳電影」、「最佳劇本」、「最佳導演」、「最佳女主角」等十幾個獎。有人快活有人愁，得獎自然會惹嚟批評。有網民話章子怡唔配攞影后，亦都有網民將中港矛盾意識帶到電影評論，批評好似《一代宗師》呢類合拍片，摧毀港產片云云。不過王家衛作為土生土長、港產片出身嘅導演，《一代宗師》用嘅亦係國際化製作團隊，水準實在高得有啲屈機，贏咁多獎亦無話可說。不過成個頒獎禮最難頂嘅係，臨尾出個騎呢頒獎嘉賓，「搶Fo」之餘講嘢又沒水平，可算係全晚嘅敗筆！

潮語「搶Fo」，係中文加上英文嘅地道港式語言。即係好似「紅Van」咁，一中一英拼湊而成。「搶Fo」嘅意思係「搶Focus」，即係搶焦點、搶鏡頭、搶風頭咁解。

「搶Fo」喺娛樂界嚟講，當然係一門必修科。當一班人拍攝嘅時候，鏡頭前面有好幾位演員，鏡頭未必就到自己，呢啲時候就要用身位同技巧「搶Fo」搵食。當然，太「搶Fo」就會好突兀，亦會令其他演員唔開心，隨時弄巧反拙。所以，「搶Fo」係一門高深嘅學問，「搶Fo」得嚟人哋又唔覺你搶，咁至係王道。除娛樂界要「搶Fo」之外，平時喺職場都難免要「搶Fo」，尤其係一個Project一大班人做，老細視察嘅時候，有時係要當仁不讓，「搶Fo」表達自己喺件工作上嘅重要性，當然，太「搶Fo」係會乞人憎，所以工作上同社交上「搶Fo」，都係一種修為。

好似特區政府咁，成功爭取全體立法會議員去上海訪問做Show傾政改，邊個第一時間衝出嚟盲「搶Fo」？大家有眼睇啦……唔使講邊個啦！

第一手消息請下載on.cc東網iPhone/iPad/Android/Windows Phone Apps