為穩定樓市，政府推出嘅辣招影響強勁，不單令樓價回落，政府地又頻頻流標。不過，外號「樓王」局長嘅勞工及福利局局長張建宗就一於好少理，最近就向政府申報買多咗個樓花，物業由太太擁有，喺今年一月十七日購入，係個尚未落成、位於港島東區嘅單位。總結現時佢已申報太太持有嘅住宅或商業單位共有九項，全部都係位於港島區，包括兩個中西區住宅單位、一個中西區商業單位、五個東區住宅單位及一個東區商業單位，似乎兩公婆對港島區情有獨鍾喎！

設計圖片及對白

根據佢購入樓花嘅時間推斷，估計係買房協位於筲箕灣嘅樂融軒或北角一個樓花盤，但以樂融軒較為近磅。樂融軒嘅呎價平均一萬四千元，最平實用面積五百零八平方呎嘅兩房單位，就賣約六百五十萬元，最貴嘅六百七十一平方呎三房單位就賣約一千零一十七萬元，交通方便，喺港島區嚟講都唔算貴囉。不過，上述兩款單位嘅雙倍印花稅就分別要付約四十六萬元及七十六萬元。

雖然佢申報嘅九項物業，自己只係持有其中半項，其餘都係由太太持有，如果新買嘅物業係由公司持有，咁就要畀買家印花稅，倘若係太太名下嘅，就要畀雙倍印花稅。照咁睇，佢無懼辣招勇猛入市，莫非睇好樓市前景？不過，樂融軒具有長幼共融嘅概念，鼓勵後生同長者一起生活，又可以喺同一地點分開居住，莫非佢上有高堂，諗住買嚟同啲長者一齊住？抑或買定畀自己將來同啲仔女一齊住呢？

第一手消息請下載on.cc東網iPhone/iPad/Android/Windows Phone Apps