政壇：學聯搵林飛帆來港交流
雖然台灣反服貿風波已經告一段落，但呢場風波就帶挈佔領立法院嘅學生領袖林飛帆成為社運紅人，連佔領中環（佔中）行動發起人戴耀廷都講過話想請林飛帆來香港分享社運經驗，為稍後可能舉行嘅佔中行動做好準備。據聞學聯近期積極考慮邀請林飛帆喺七月一日前後來港，與港人分享社運經驗。
林飛帆
學聯早前曾經舉辦遊行聲援台灣學生，雖然參與人數唔算多，但總算代表部分港人關心台灣反服貿事件。話說有成員年初出席港台兩地交流會時，雙方都認為兩地社運成員應該加強溝通，但當時適逢反服貿熱潮，林飛帆要忙住籌備佔領立法院，所以先至未能成事。不過，依家反服貿風波總算告一段落，學聯就打算接觸林飛帆，睇吓佢有冇興趣來港交流。
雖然各方都非常關心林飛帆會唔會來港，但有知情人士透露，其實林飛帆周不時都會來港參與社運，只係冇乜人認得佢。林飛帆之前喺訪問自爆，佔中商討日啟發佢籌備太陽花學運，唔知當佢來港後，又會唔會激發港人走去佔中呢？又會否被批評為台獨介入佔中行動呢？
