政壇：甘文鋒自爆係體操裁判
南區區議會海怡西選區補選，由新民黨嘅候選人陳家珮勝出，該黨主席兼行政會議成員葉劉淑儀上個禮拜就特別安排到鴨脷洲大街一間小廚設海鮮宴，慰勞一班同事助選團。現場見到該黨青年委員會前主席甘文鋒，佢除咗懂得六種語言外，原來體操都係強項。阿鋒自爆話讀中學時學體操好有天分，但由於懶於練習，結果最後去咗考體操裁判牌照，齋睇唔使練習，真係條條大路通羅馬。
甘文鋒（箭嘴示）係新民黨嘅青年才俊，估唔到連體操都咁耍家。
中文大學畢業嘅阿鋒喺中學時代學過體操，其中在跳彈網方面表現唔錯，但佢就自嘲有少少懶，唔想花時間練習，所以就問教練有冇其他出路。教練當時提議佢考裁判牌，咁咪可以淨係睇人哋玩，自己唔使練習囉！結果佢真係去考咗四個體操裁判牌照，包括彈網、藝術體操等。
阿鋒除咗經常獲邀擔任本地體操比賽項目裁判外，上屆倫敦奧運會仲獲邀到電視台做比賽旁述添！佢話香港體操項目裁判數目唔多，所以佢都會盡量出席，為體操界出一分力。
講番當晚餐海鮮宴，除咗葉劉同愛女一齊揀靚海鮮外，副主席田北辰亦應同事要求，同黨內一班男高層做掌上壓搞氣氛，一口氣做十下都面不改容。
