政壇：大舊石 克勤仔查黨友唔避嫌
盛事基金醜事一籮籮！早前盛事基金花八百萬元贊助嘅曼聯對傑志表演賽先鬧出球場爛嘅國際笑話，最近又輪到畀審計報告踢爆多年來成效不彰、撥款混亂、甚至有篤數之嫌。
設計圖片及對白
立法會政府帳目委員會已決定要調查盛事基金呢筆糊塗帳，屆時盛事基金評審委員會主席Jeffrey林健鋒，同埋獲盛事基金資助嘅香港龍獅節活動召集人「橄欖」陳鑑林都好大機會被傳召。不過，同佢哋係黨友嘅帳委會主席「大舊石」石禮謙同委員陳克勤就講到明唔會避席。
惹角色衝突質疑
帳委會將就盛事基金嘅管治及如何運用公帑舉行公開聆訊及Jeffrey同橄欖好大機會走唔甩。有帳委會委員就質疑，與Jeffrey同屬經民聯嘅大舊石，以及與橄欖同屬建仔嘅克勤仔應該避席，否則會令人質疑有角色衝突、偏幫黨友，尤其大舊石係帳委會主席添！
我哋問過大舊石同克勤仔，克勤仔就話根據《議事規則》，有直接金錢利益嘅話先要申報，橄欖同建仔喺有關事件上都冇金錢利益，所以覺得唔需要避席。如果只係因為佢同橄欖係黨友，帳委會個個都識橄欖，咁個個都要避席咁話。至於大舊石就話，立法會有申報機制，況且聆訊係公開嘅，乜嘢都係喺陽光下進行喎！佢哋講到咁，即係點都唔會避席喇！
不過，有帳委會中人就透露，克勤仔疑似率先為盛事基金講好話，話說帳委會星期三開閉門會議時，審計署批評盛事基金嘅「盛事」冇新意，年年都係嗰幾味，但克勤仔就反駁︰「係盛事先年年搞，唔通龍舟扒一年唔扒一年咩！」
帳委會五月五日會先舉行兩場公開聆訊，首先處理咗房屋規劃重建同社企發展兩個項目，至於盛事基金就未知幾時舉行聆訊。不過，有消息就話大舊石身體有啲問題，五月要做手術，最少要抖番一、兩個星期。我哋問番大舊石，佢就話私人事唔講咁多喎！
