【本報訊】羅湖橋昨「塞人」十小時，觸怒各類「過客」，眾人縱不情願，卻要攜着大小行李，逼在一起肩並肩、身貼身「肌膚相親」，小朋友「扭計」叫嚷，成年人皺眉暗罵，老人家撫腰抹汗。出境人潮中亦有年中無休的水貨客，復活節公眾假期也繼續攜着大包小包，偷運水貨奶粉、尿片等過關，且不時因延誤他們「搵食」而鼓譟。

有長者在羅湖橋難抵悶熱，不停抹汗。

排到一肚氣
李先生：足足排咗成個半鐘頭先入到深圳，都冇公布點解要排咁長龍，大家只係喺度排，入深圳只係間歇性放行，過關速度極慢。

港人巫太：我帶媽媽同兩個讀小學嘅女兒經羅湖返深圳，排咗成個半鐘頭隊，以往入境都唔使二十分鐘，今次又老又嫩排長龍，真係辛苦。

昨日擁塞在羅湖橋上的人潮多為一家大小，他們扶老攜幼趁復活節長假期回鄉探親，小孩揹着背囊，父母拖着行李篋，擠在「蛇餅」中苦不堪言，有小孩「扭計」怨道「好焗！」，父母牽緊子女的同時，亦暗罵「好耐！」，長者更是悶熱難抵，不停抹汗，甚至有年輕人等得不耐煩，不停自拍「留念」，又不停張望前方的人龍，探個究竟。

人潮中亦不乏水貨客，他們攜着兩罐奶粉，亦拖着滿篋尿片、飲品、零食，擠在人堆中令他們甚鼓譟，不滿因過關延誤而可能「走少轉」，影響整日收入，故當水貨客過關後，便會拿着大堆水貨急步奔跑，衝向羅湖口岸外的水貨集團接頭人收錢，然後再趕回港「跑多轉」。

第一手消息請下載on.cc東網iPhone/iPad/Android/Windows Phone Apps