審訊淫媒拖字訣 莫非又想玩花樣

話說去年三月大角咀發生懷疑弒親命案，案件進入司法程序後，壹淫媒旗下《蘋果日報》及已經摺埋嘅《爽報》居然喺頭版刊登被告嘅專訪，涉嫌藐視法庭，律政司拖咗四個月，去年七月及八月先至落案檢控兩報及相關總編輯、記者，而最奇怪嘅係，案件拖到依家仲係開審無期。正如家長聯會會長李偲嫣質疑，呢單藐視法庭案發生超過一年，拖到《爽報》執咗笠仲唔開審，究竟有冇搞錯吖。而學者宋立功就話嘞，案件一拖再拖，律政司隨時要用更多人力物力處理，唔止浪費公帑，亦影響外界對香港司法嘅觀感。

一單涉及刑事嘅案件一拖再拖，如果話當中冇不可告人嘅秘密，邊個會信呢？最耐人尋味嘅係，律政司喺檢控《蘋果日報》及《爽報》之前，竟然另外花費公帑「諮詢」獨立資深大律師意見，當局究竟係缺乏資深大狀定係畏懼外國勢力吖？係人都知，壹淫媒打住民主旗號，同外國勢力一向眉來眼去，當局投鼠忌器，一啲都唔出奇o架。

有大律師踢爆，由於控辯雙方需要交換文件，就算律政司已入稟高院，亦要等到辯方準備就緒先會排期聆訊，唔排除辯方以準備不足為由，遲遲唔向法院確認，藉此拖延審訊。

冇錯嘞，壹淫媒最叻就係玩拖字訣，大家早就見怪不怪咯。咁多年來，壹淫媒旗下刊物違反《淫褻及不雅物品管制條例》嘅個案累積達一百二十八宗，次次都獲輕輕放過，其中十九單案一拖再拖之下，獲當局批准一併處理，最後只有部分個案被判罪成，其餘獲得當局放生，而就算罪成嘅個案亦不過罰款幾千至幾萬元咋。有位律政司代表律師日前公開發表所謂「有錢人」嘅偉論，睇嚟淫賤黎可能就係當局眼中嘅「有錢人」啩，否則，點解會得到當局一而再、再而三嘅特別照顧呢？

講開又講吖，港英餘孽同淫賤黎狼狽為奸，互相包庇，早就唔係新聞。唔怕唔識貨，最怕貨比貨，香港對淫媒百擒百縱，而台灣就依法辦事，從來唔會姑息養奸。近年淫賤黎將魔爪伸到台灣，大肆渲染色情暴力，挑戰法紀同道德底線，激起當地民憤，受到嚴厲懲罰，台北當局講到明o架，見一鑊罰一鑊吖。所以話，台灣有正氣，香港充滿邪氣，唔沉淪至奇喇，叮！