城中鏡：鄭錦鐘添五公職忙爆

剛卸任保良局主席一職嘅鄭錦鐘（Eric），終於回復自由身，但點知轉個頭仲忙咗。何解？原來Eric近日被委任五項公職，開會車輪轉咁上，結果「少一多五」，想清閒都難。五項公職包括保良局顧問、警務處耆樂警訊中央諮詢委員會委員、撲滅罪行委員會青少年罪犯問題常務委員會委員、九龍區事顧問總會會長同安徽省政協。

鄭錦鐘（左二）擔起五項新公職，愈忙愈開心，太太關巧妍（右二）、大仔鄭泳舜（左一）同新抱胡可兒（右一）都讚佢魄力十足。

講起做安徽省政協，原來有段古。話說Eric出世無耐，爸爸同佢算命，相士話佢命格較弱，必須過契畀人至養得大。鄭爸爸愛子心切，走去隔籬敲一位安徽鄰居門，對方爽快答應。就係咁，Eric多咗個安徽契爺，仲學埋安徽話添！呢位契爺年前仙遊，骨灰安放喺安徽，Eric話稍後有時間會去當地拜祭，盡點孝心。

講番保良局換屆晚宴，Eric響應環保，將菜單簡約至「四餸一湯」，減少廚餘，又首次喺晚宴會場設置甜品自助餐，有多款蛋糕，朱古力、雪糕、魚蛋麵任食。臨別秋波，算留個美好回憶畀大家。