城中鏡：博愛新舊交接 行善大計多
博愛醫院新一屆董事局尋日正式履新，新任主席何榮添接棒，今屆董事局嘅特色係有好多新面孔，亦有唔少「回巢」總理，包括趙瑤同廖齡儀等靚女。香港能源礦產聯合會會長殷劍波特地嚟支持太太林群就職總理，殷劍波話，嚟緊佢會投放資源喺中港兩地搞慈善公益事業，一於同太太齊齊做善事。
博愛醫院新任主席何榮添（右）喺卸任主席曾耀祥手中接棒，未來有排忙。
殷劍波（左）同太太林群喺公餘時間瞓身做善事。
李淑媛（中）同蘇廣文（左）就職總理。右為潘治忠。
殷劍波表示，能源礦產聯合會內有一班熱心嘅優秀企業家，一向熱心捐助養老院、孤兒院，亦不時到內地山區修路建橋，下一步將喺會內成立一個部門，全力推動慈善事業。其中喺香港方面，將集中幫助弱勢群體嘅兒童、青少年同貧困家庭，預計近兩個月將有大型活動。殷劍波本身從事礦業，佢太太林群話平時都會喺公司幫手，忙個不停。
天水圍設社企咖啡室
博愛醫院副總幹事吳凱孚話，最近院方喺天水圍成立一個青少年中心，內設一間自負盈虧嘅社企咖啡室，佢哋將會提供區內青年職業技能培訓，例如咖啡師等。負責項目嘅係今屆升呢做副主席嘅簡陳擷霞，簡太話，呢間社企啱啱投入服務，期望可以為天水圍區嘅青少年，帶嚟更全面嘅社會服務，締造和諧美好嘅社區環境。
新主席何榮添話，上任後重點工作之一，係全力跟進屯門藍地十萬平方呎土地興建全港最大型安老院舍一事，目前院方正同安老事務委員會等多個政府部門密切磋商，計劃提供一條龍長者安老服務。今屆董事局新丁總理仲有位靚女李淑媛，見佢同博愛前主席潘德明囝囝潘治忠好好傾，兩人都做金融業，難怪有咁多話題啦！
