政壇：大坑申設舞火龍博物館
唔少人都覺得，香港具特色嘅建築物或者有集體回憶價值嘅嘢愈嚟愈少，尋日第四期活化歷史建築伙伴計劃喺中午截止申請，大坑坊眾福利會康樂組副主任李漢文都喺截止前交表，申請將大坑書館街十二號嘅三級歷史建築物活化做舞火龍博物館。
書館街十二號屬於三級歷史建築。（資料圖片）
大坑舞火龍係仍然傳承嘅中秋節傳統節目，每年吸引好多市民遊客參觀。
佢話，博物館除咗介紹舞火龍嘅習俗起源外，仲構思拍攝立體版舞火龍宣傳片，畀入場市民同遊客感受中秋舞火龍嘅盛況同氣氛。佢哋計劃館內擺設一比一嘅火龍龍頭同龍尾，畀市民同遊客近距離影相留念，甚至一試舞火龍滋味，感受吓火龍嘅重量，佢話：「好多遊客都反映，好想同火龍影番張相，但舞火龍係一年一次，而且唔畀啲人行埋去，驚有危險，（喺博物館）有得親自舞火龍，應該有吸引力。」不過，佢哋都有對手，因為孔聖會同樣有意活化該建築物，但就提出預留地方供福利會辦舞火龍博物館。
發展局共收到十五份申請書，其中以書館街十二號嘅申請最激烈，共收到七份申請書；上水何東夫人醫局亦收到五份申請；舊牛奶公司高級職員宿舍都有三份申請；至於最受矚目的法定古蹟景賢里，因為資料有改動，申請截止期限獲延長一個月。
