政壇：內地渠蓋都可以投保
市政管理唔簡單，年前內地發生妙齡少女下雨天出街，踏渠蓋跌下失蹤後，城市陷阱就多咗一項。不過，俗語有話，有危機就有商機，中國財險今年就有一筆新生意，事關佢哋承保咗貴陽市旗下7,845個渠蓋，每個渠蓋保費盛惠9蚊（人民幣‧下同）。
查一查資料，原來舊年貴陽市政府已經為市入面6,295個渠蓋，幫襯財險買保險，總保費加埋都係12.7萬，濕濕碎。好彩嘅係，舊年貴陽市七單渠蓋所引起嘅事故，都只係電單車中「陷阱」，人就冇事。財產損失嘅話，財險最高賠50萬；如果因為渠蓋被偷、損毁、人間蒸發，而令到有人命傷亡，最高可以賠60萬，醫療費就係5萬喎。
據講，渠蓋呢類舊金屬好值錢，無論係內地或者香港都可以賣到好價錢，所以成日畀人偷，依家有呢類保險買，唔少人可能鬆口氣。
