政壇：刑恐疑漢亂撻新民黨個朵

報料嘅讀者話，該名私人助理嘅老公姓蕭，上禮拜三由內地返香港到達羅湖港鐵站票務大堂時，想掉轉頭原路返回內地，港鐵職員就梗係唔容許啦，蕭生於是吵吵鬧鬧，由下晝搞到夜晚七點鐘，除咗聲稱自己係新民黨成員，仲聲稱可以即刻炒（解僱）有關港鐵職員，又涉嫌恐嚇會打人，港鐵職員於是立刻報警，警方以涉嫌刑恐罪將佢拘捕。

葉劉話經過調查後，證實佢嘅私人助理同老公都唔係新民黨黨員，強調事件同該黨冇關，不過經此一役，佢會警惕同向黨員發出指示，叫佢哋喺公眾場合，唔好動輒就撻新民黨個名出嚟，以及要為自己所做嘅行為負責。