政壇：周一鑊扮窮博抓錢

平機會尋日向立法會政制事務委員會提交文件，促請政府增加撥款，佢哋嘅理由係現時辦事處租金高企，就算租平啲嘅地方，始終租金會增加，要解決呢個問題，就係有自己嘅永久辦事處喎。份文件仲計吓數，話辦事處嘅租金由○五年每平方呎二十二蚊，增加至一一年每平方呎四十二蚊，今年十二月將要續租，估計租金會再上升，屆時就會出現每年約四百萬嘅不敷之數。

解決問題係分內事

平機會強調，咁多年嚟租金上升，政府都冇為平機會提供專項額外補助，如果佢哋繼續動用儲備嘅話，兩年左右會耗盡儲備喎。主席係平機會嘅實權人物，處理問題、解決疑難，本來就係分內之事，就好似一個家庭咁，通脹上升，做妻子嘅都冇可能要老公嘅家用畀足通脹增幅啦！而且，想置業有永久辦事處嘅機構大把，周一鑊如果一味嗌窮，向政府施壓，睇怕政府都係諗吓早啲換人好過。

何況周一鑊呢頭呻窮，但佢上場之後，已傳出佢哋要重新招聘行政總裁一職，結果都被政府拒絕咗，而立法會議員同人權組織都狠批佢領導嘅平機會浪費公帑，可見該會若然唔改大花筒作風，喊窮實冇人睬o架啦。