乘客逃票不文明 港鐵縱容發雞盲
香港交通費昂貴全球出名，仲要年年加價，上班一族嗌晒救命。不過咁，香港人出名精甩辮，你有你貪婪，我有我蠱惑，唔少乘客居然可以享受半價甚至每程兩蚊嘅超值「優惠」，又冇人理會喎，邊間運輸機構咁貪婪又咁慷慨？咪就係港鐵囉。
唔講唔知，香港自稱文明法治社會，原來違規濫用港鐵優惠嘅情況非常嚴重。網上討論區大把人分享呢方面嘅「經驗」，有人甚至話，自己五年來都係用優惠票搭港鐵，慳咗一大筆，而且從未失手畀人捉過。
咪以為只係作大吹水吖，本報記者一連幾日下晝收工繁忙時間，喺多個港鐵站出入閘位觀察，發現真有其事。每隔幾分鐘就有疑似逃票乘客出現。高峰期一個鐘就有約二十個，當中包括上班族、中年漢同主婦師奶。
按港鐵規定，三至十二歲嘅兒童、十二至二十五歲嘅全日制學生，乘車可享受半價，港鐵職員及其直系親屬亦可免費乘坐港鐵。前年開始，六十五歲以上長者及殘疾人士，乘坐港鐵每程只需兩蚊。本來係優惠政策，弊在無人監管，結果變成漏洞嘞。現時任何人都可以申請長者八達通，毋須登記個人資料，亦冇數量限制，幾多都得，申請長者優惠八達通易過借火，有着數唔攞就笨嘞。
既然八達通優惠出現大漏洞，港鐵照計要加強執法，堵塞漏洞至啱數，奇就奇在，據記者觀察，雖然閘內閘外都有港鐵職員駐守，佢哋根本就當逃票族透明，就算閘機點「嘟」，都詐睇唔到，逃票問題愈演愈烈咪就係港鐵縱容囉。
小數怕長計，逃票一個月落嚟慳番唔少o架，而且車程愈長慳得愈多，港鐵每月一定少收一大筆。問題有幾嚴重？記者向港鐵查詢逃票嘅檢控數字同涉及金額，對方居然以「從不公開透露」為由，拒絕回應。
唔係啩，又唔係乜敏感資料，點解唔可以透露？係有「難言之隱」，定係港鐵想出蠱惑，將逃票造成嘅損失轉移畀遵紀守法嘅乘客？咁即係擺明慷納稅人慨，兼搵守法乘客老襯啫！
世不患無法，而患無必行之法。港鐵既然訂咗相關規定，就要有法必執，執法必嚴，唔可以隻眼開隻眼閉扮盲，坐視逃票族損害其他乘客嘅利益。
嗱，有立法會議員就講得啱，港鐵除咗加強宣傳，管理層亦要檢討，叫前線加強截查，否則只會愈來愈多人逃票。咪話太一叮唔提醒，再唔做嘢，遲早要取消自動閘，好似落後地區咁，用人手檢票嘅咋，叮！
