中央政府邀請全體立法會議員訪問上海，行程喺尋日下晝舉行嘅重頭戲、即同中央官員就政改座談後正式結束，而議員大隊尋晚就搭飛機返港嘞！

馬逢國喺上海換埋套金像獎禮服先上機。

由於訪滬行程緊密，加上舟車勞頓，個個議員一落機都露出一臉倦容，唯獨係體育、演藝及文化出版界嘅議員馬逢國特別醒神。點解？事關見佢落機時竟然身穿一套型格禮服，仲戴上一個銀色煲呔添！執到咁正，睇怕有重要約會啦！果然冇錯，原來佢係趕住去尋晚嘅金像獎頒獎典禮。

金像獎話晒係電影業界一年一度嘅大事，身為業界代表嘅馬逢國話唔想遲到，但又唔想自己離團早走，索性帶埋套禮服去上海，仲喺上海換埋衫先上機，咁返到香港就唔使嘥時間走多轉返屋企換衫囉！

第一手消息請下載on.cc東網iPhone/iPad/Android/Windows Phone Apps