城中鏡：郭位訪日必帶輻射儀
沙田馬場尋日聚集咗唔少醫護界專業人士，佢哋都係嚟出席今年以醫藥衞生為主題嘅賽馬會社群日。
郭位出咗本新書，透過福島核事故分析核電安全問題。
餓到面青青嘅高永文（右）幫施文信（左）量血壓。
劉燊濤（右）同太太吳奕筠（左）都係利物浦粉絲。
喺場內見到城大校長郭位，身為核能方面權威嘅佢話日本福島核電廠事故之後，其實係有技術同方法可以將啲受輻射污染嘅水淨化，減低事故嘅影響，但由於成本較高，日本方面並冇採用。所以佢日前就出咗本新書專講呢個問題，仲翻譯咗多種語言添！講到啲輻射咁犀利，咁佢夠唔夠膽食日本菜呢？佢話有時忍唔住都會食，但如果去日本，佢就一定會帶住部測輻射儀器嘞！
高永文饑饉頂硬上
轉頭見到食物及衞生局局長高永文，見佢臉無血色咁，原來佢參加咗饑饉三十活動。不過，原來呢件事係意外，事緣佢前日獲邀做活動領誓嘉賓，喺台上拎起誓詞宣讀一刻，先知原來自己都要一齊參與，惟有硬住頭皮頂硬上。前晚佢出席其他活動時，望到啲燒肉仲忍唔住流晒口水，尋日馬會行政總裁應家柏仲要喺正佢隔籬食香噴噴嘅龍蝦添，認真大整蠱。捱緊肚餓嘅高永文上晝參加完單車百萬行，之後中午喺馬場又要幫馬會主席施文信量血壓，活動頻頻但就冇飯食，真係陰功。
之後又遇到啱啱喺英國返嚟嘅工業總會青年委員會副主席Gary劉燊濤同太太吳奕筠，一場去到英國，佢哋仲臨時撲咗兩張黃牛飛睇咗場利物浦作客韋斯咸添！不過，身為利記粉絲，Gary被迫坐喺韋斯咸球迷一邊，機警嘅太太驚佢睇波時情難自控，所以故意喺隔籬扮晒支持韋斯咸，好在最後利記贏二比一，Gary心情當然大靚啦！
