「港股直通車」喺七年前提出，隨即被中央無緣無故的緊急煞停；今天，易名「上海香港直通車」（大陸化簡稱叫做「滬港通」）卻又無聲無息下突然「殺到」。

國務院總理李克強喺博鰲論壇失驚無神地宣布這「滬港股票市場交易互聯互通機制試點」於六個月後會正式開通，殺港交所一個措手不及，要忽然停牌，（目及）吓發生乜嘢事先！

以往，凡大陸中央決定的事，香港一棚擦鞋仔，不管好壞，都跟阿爺指揮棒上下跳動，但今劑幾乎全港啲「財經界演員」皆一面倒的唔敢幫口，及不睇好呢單乜乜互聯互通，只得那些廣東話說不好的內地「金融分析師」一致讚好，甚至低能反智地說，李總理特意選博鰲論壇有全球金融領袖在場的時刻作此宣布，係對香港一個最大肯定的禮物，難怪香港廢柴政府領導人也喜孜孜地自誇香港是個「超級連繫人」角色，措施為香港經濟發展提供新動力，果真如此？傻o架咩！咁都信！

淨係看到大陸佬將呢件牽涉香港經濟命脈的重大事幹，如斯草率急忙出台，無程序、無商無量無規矩，就知背後有景轟啦！最低層次的估計，係大陸有啲嘢，要好短時間內搬走大舊人仔出國，而人民幣不是國際流通貨幣，遂迫令香港這個堅有國際金融地位的掩護，做有利他們的好事！所以，當大家仲講緊內地金融市場點樣無規矩和假帳無王管的層面時，我看到大陸已再不理香港死活，盡地一煲利用香港的殘餘價值，為國捐軀，不信？走着瞧！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊（目及）實政府

第一手消息請下載on.cc東網iPhone/iPad/Android/Windows Phone Apps