政壇：搞搞政：廣東社團總會換屆 主席位忽然搶手

KK已連任一屆主席做足六年，所以競逐連任嘅機會唔大。按社團嘅慣常做法，主席人選會喺會內資深嘅副主席之中揀選，但今屆突然多咗好多飛來蜢對個位虎視眈眈，包括身兼廣東社團總會首席會長嘅全國政協常委陳永棋，同埋客屬社團聯合總會會長梁亮勝。

統戰部疑推梁亮勝上位

陳永棋喺政壇有一定地位，照計坐喺總會「神壇位」咪好囉，點解失驚無神要爭落手落腳做嘢嘅主席位呢？口痕友就話佢志在攞大紫荊勳章，所以只諗住做一屆，到時攞埋勳章就功德圓滿嘞！

至於梁亮勝參選就更具戲劇性，事關佢連廣東社團總會會員都唔係，又點可以空降做主席呢？最近就流傳一張發畀客屬總會旗下梅州及嘉應商會嘅文件，文件話內地某省統戰部要求大家推薦人選競逐廣東社團總會主席，暗示推舉梁亮勝上位。

眼見陳永棋突然話要做主席，操盤人都唔敢去得太盡，據悉梁亮勝只會做第一副主席，順便入埋會先，然後坐定定等三年後接陳永棋棒。咁啱一八年陳永棋卸任全國政協常委後，梁亮勝就會接埋政協常委，達到終極目標。

消息傳出後，聽聞總會內部有人極之不滿，話會內大把出錢出力嘅人冇份上位，做法好唔公道喎。不過，世事難料，未到最後揭盅，情況都可能有變。