政壇：馬斐森踢左翼腳法生硬
又到咗香港大學同中文大學每年一度嘅「兩大校長盃」嘞！剛履新嘅港大校長馬斐森同剛續任嘅中大校長沈祖堯尋日一齊主持開球禮。對於校長新職務，馬斐森話目前尚在適應中，但佢話上任頭兩個禮拜既忙碌又愉快，為咗多啲了解學校，佢一得閒就會喺校園四圍逛。佢又話上個禮拜曾經同學生代表會面，曾交流佔領中環行動、六四同國際學生取錄等議題，強調往後會繼續同學生及職員代表保持接觸。
馬斐森（右）首次參與「兩大校長盃」足球賽，同沈祖堯主持開球禮。
至於尋日場「友誼波」，港大同中大一如既往，各自派出以教職員組成嘅球隊應戰。馬斐森為咗幫港大隊打氣，親自披甲上陣，着6號球衣踢左翼位置。原來馬斐森都係一名足球迷，亦係英超球隊熱刺嘅擁躉。不過，佢話已經有三十五年冇認真咁落場踢波，近日亦應酬多、運動少。如此久疏戰陣，難怪球場上嘅馬斐森腳法生硬，走位有欠靈活，以致控球機會甚少。最終馬斐森亮相球賽約二十分鐘即告退場，港大隊亦以1比2輸咗畀中大。
