五十二位訪滬嘅立法會議員尋日下晝出席座談會，同三位中央官員就政改同其他社會議題交換意見。雖然泛民主派喺成場座談會搶盡風頭，但醫學界「怪醫」梁家騮依然可以吸引到眾人注視。點解咁講？話說會面接近尾聲時，怪醫突然企起身用佢嗰啲「唔鹹唔淡」嘅「煲冬瓜」向港澳辦主任王光亞提問，搞到連負責主持會議嘅立法會主席曾鈺成都忍唔住寸佢兩句。

坊間有人建議提名委員會要以「全票制」方式選出特首候選人，怪醫發言時主要話自己唔贊成特首選舉採用「全票制」，但佢未講完，其他議員就因為佢啲煲冬瓜講得太差而笑唔停，連曾鈺成都借呢個機會取笑佢，話好彩怪醫唔係用煲冬瓜嚟醫人，否則就真係好危險，搞到怪醫好尷尬。

第一手消息請下載on.cc東網iPhone/iPad/Android/Windows Phone Apps