政壇：李漢奸 民主阿婆 落機被柴台
近半個月去美國同加拿大「唱衰香港」嘅「李漢奸」白鴿黨創黨主席李柱銘及「民主阿婆」前政務司司長陳方安生，尋日終於肯返香港，正當佢哋癡心妄想以為自己凱旋而歸，但原來一落機已經被二十幾人「接機」柴台。一班市民睇唔過眼佢哋日日賣港，專登拉埋橫額鬧爆佢哋反中亂港、賣港求榮，點知民主阿婆因為示威者太大聲，一個人匿埋喺機場貴賓室入面，留低李漢奸單拖喺群眾面前獻世，呢啲咪叫患難見「真情」囉！
李漢奸（右）懶有型咁向示威者送花，點知被人噴到一面屁。
民主阿婆（右）見示威者來勢洶洶，一個人匿埋喺機場貴賓室入面。
尋晚兩人一落機，已經見到二十幾人示威，嚇到民主阿婆唔敢出嚟，賴低李漢奸一個人見記者。李漢奸本來懶有型咁向示威者送花，但班市民當然請佢食檸檬、叫佢慳啲啦！李漢奸惟有面懵懵見記者，死撐話係北京唔肯見佢，佢惟有將香港情況話畀國際社會知喎，並唔係向中國施壓咁話。
肥佬黎跣自己員工?
李漢奸講到一半，民主阿婆至出嚟講嘢，話以前做政府官員時都成日出訪外國，又話西方國家喺香港有好龐大嘅投資，同埋有國民喺香港居住，嗰啲國家都好擔心自己嘅國民，唔明點解咁都叫勾結外國勢力喎。講得真係好笑，外國要了解香港情況，使你民主阿婆山長水遠去報告？
此外，尋日泛民主派人士宣布結束多日絕食行動，同日《蘋果日報》就報道自己老闆肥佬黎同天主教香港教區前主教陳日君都會去「撐場」，點知最後只得陳日君現身，肥佬黎就影都唔見。我哋問過絕食行動召集人李卓人，佢話肥佬黎尋日唔喺香港，亦冇話會到場。咁唔知係肥佬黎嘅員工收錯風吖，定係肥佬黎放流料老點自己嘅員工呢？
