立法會工務小組後日會再次審議擴建將軍澳堆填區，以及興建石鼓洲焚化爐，即係俗稱「三堆一爐」撥款。政府舊年年中都試過夾硬闖關申請撥款，但因為將軍澳大力反對，先撤回將軍澳堆填區撥款，點知就兵敗如山倒，最終通過終止辯論。一班西貢區議員梗係唔放過政府，轉而向有票在手嘅立法會議員施壓，其中身兼立法會新界東議員嘅范國威，就同區議員何民傑等人，尋日去到建仔總部踩場，要求對方否決撥款，點知出師不利。

設計圖片及對白

話說佢哋一行數人，尋日朝早帶同橫額同道具去到建仔北角總部，點知尋日係禮拜日，建仔當然大條道理拉閘啦，所以佢哋連門口都入唔到，就要落番去地下示威。如果唔係整埋道具同橫額，市民齋睇出到嚟張相，隨時連向邊個示威都唔知。

建仔唔聽民意攞嚟衰

何民傑話建仔舊年六月中委會已決定反對擴建將軍澳堆填區，點知喺上月底環境事務委員會投支持票，佢仲點名批評新界東嘅EQ葛珮帆同陳克勤，質疑佢哋違反民意。佢哋帶同補腦丸道具，話要畀建仔補腦，記住舊年嘅承諾，唔係就要「堆債票償」。范國威就話公民力量都話反對擴建將軍澳堆填區，或者會向同佢合併咗嘅新民黨有同樣承諾，又揚言會有後續行動。

其他人可能唔知，但范國威作為立會議員，冇理由唔記得包括建仔在內嘅五十幾位議員尋日仲喺上海，點解唔等多日等佢哋返港先去踩場呢？其次，即使建仔開門，都搵唔到議員回應啦！范國威呢次開空槍，騷味極濃。建仔又抵死嘅，EQ同陳克勤係新東議員，竟然唔理當區居民嘅反對聲音，當民意冇到，抵畀人踩場鬧爆。

雖然將軍澳唔係建仔票倉，但相信只有分配去呢區嘅EQ要緊張啲，相反唔少泛民同獨立嘅方國珊喺呢區得票較多，泛民去搵建仔，係咪緣木求魚呢？

第一手消息請下載on.cc東網iPhone/iPad/Android/Windows Phone Apps