跳蝨試場真羞家 藏污納垢最丟架

太一叮唔係講笑，而係真有其事o架。近日有女學生投訴，喺深水埗一間學校應考中學文憑試時懷疑畀跳蝨狂咬，雙腿出現斑斑紅點，真係我見猶憐。最恐怖嘅係，跳蝨竟然跟埋學生返屋企，真係諗起都毛管戙﹗

最慘嘅係，該女生有特殊學習需要，專注力比較弱，畀跳蝨狂咬之下痛癢難忍，導致難以專注應考，未能完成試卷，十年寒窗苦讀隨時前功盡棄，認真無辜。正如女生母親批評，當局明知考生有特別需要，仍然容忍校園孳生害蟲，令佢非常失望。其實，文憑試「一試定生死」，足以影響考生前途，考評局同教育局咁嘅安排，點止令人失望，簡直係靠害喇。

話時話，影響成績仲係其次，影響健康先至事大吖。有傳染病醫生警告，畀蝨咬引發嘅嚴重併發症，分分鐘可以攞人命。係人都知，考評局烏煙瘴氣，醜聞多多，出錯題目、改錯試卷甚至唔見試卷係家常便飯，考生早已被玩殘，估唔到依家連應考都要搵命博，你話係咪離譜吖？今次就話試場有跳蝨啫，容乜易下次有超級病毒，睇嚟以後考生可能要自備防護衣都似。

講番呢間學校，本報記者實地睇過，發現有雜物堆積嘅情況，亦有唔少陰暗潮濕位，衞生環境相當惡劣。正如有人質疑，除咗呢名考生被蝨咬，都唔知仲有幾多學生受害。

當然喇，一污俱污，香港到處藏污納垢，又點止呢間學校吖。大家不妨留意下橫街後巷，垃圾堆積如山，污水臭不可聞，老鼠大隻到連貓都怕怕。曾經有位外國女遊客喺中環畀老鼠咬傷添，真係失禮死人！

清潔香港講咗幾十年，點解愈嚟愈污糟？咪因為港產官僚冇做好份工囉，佢哋平時懶懶閒，疫症殺到埋身至大鑼大鼓出嚟做清潔騷，又揸掃把又揸抹布擺晒甫士，至弊有姿勢冇實際，風風火火洗完一輪太平地後，一切回復舊貌，衞生黑點打回原形。再咁落去，何止有跳蝨，香港遲早變臭港、垃圾港添吖。

所以話，怪事年年有，今年特別多。學校養跳蝨的確係奇聞，連有三十年滅蟲經驗嘅專家都話從未聽過，睇怕「跳蝨試場」有潛質打造成全新旅遊景點。你知喇，好多旅客都有獵奇心理，佢哋睇到香港呢個所謂國際都會，竟然好似第三世界咁，肯定嘆為觀止o架，叮！