潮語「美魔女」嘅意思，係指一啲三十五歲以上，但係依然打扮得好靚，皮膚樣貌都係漂亮非常嘅中年女性。呢個潮語係由於一啲中年日本女明星，到咗四十幾歲，但一樣以極美麗動人嘅姿態亮相，當地傳媒稱呢類中年女藝人為「美魔女」，後來呢個詞傳到華文社會，依家凡係中年女藝人而又Keep得好靚，仲係充滿電力嘅都稱為「美魔女」。

到底今時今日，傳媒需唔需要講道德？作為社會監督嘅第四權，尤其香港仲有斗零言論同新聞自由嘅地區，傳媒對社會始終仲有一定影響，記者支筆隨時會隊死人。好似近期有本周刊，影到一位前港姐喺銅鑼灣賣魚蛋，又報道過一位前艷星依家做緊一啲基層工作。其實咁又有乜值得去報道呢？有人離開鎂光燈花花碌碌嘅生活，洗盡鉛華自力更生，過普通人嘅生活，好心啲記者就放過佢哋，畀條生路人哋行吓。自力更生，不靠男人靠自己，係應該尊敬同尊重，唔應該騷擾至啱，不過啲記者硬係要走去搞人。不過咁，從港姐賣魚蛋個報道嚟睇，嗰位香港小姐實在依然明艷照人，雖然已屆中年，但就真係Keep得唔錯。就算冇周刊報道，都好難會認佢唔出就係當年嘅香港小姐冠軍，真係名副其實嘅「美魔女」。

香港「美魔女」嘅代表有邊個？我諗都好難有個答案。如果我揀嘅話，年近五十嘅周慧敏，永遠漂亮嘅鍾楚紅，到今日都仲係咁索嘅溫碧霞，都可以係「美魔女」嘅代表。依家，連普通素人都可以稱之為「美魔女」，總之係中女又識打扮又風韻猶存嘅，都會自稱或被稱為「美魔女」。喺好多社交媒體，都有唔少中年婦女，花枝招展咁將啲自拍照展露出嚟，呢啲都係素人「美魔女」愛做嘅事，至於係咪真係「美」，呢啲就真係見仁見智，創作嘅嘢好主觀嘅……

第一手消息請下載on.cc東網iPhone/iPad/Android/Windows Phone Apps