立法會已經開始審議財政預算案，議員發言時，好多都鬧財政司司長曾俊華（鬍鬚曾）成日估錯數，盤數準確度咁低，害人不淺。不過，揶揄鬍鬚曾計數差嘅泛民，其實都係屎數一族，預算案審議若爆拉布戰，泛民分分鐘又計錯數，到時政府出現財政危機，市民受害，怨氣必指向泛民，最終又係弄巧成拙。

設計圖片及對白

譬如立法會審議「買家印花稅」辣招草案時，泛民鬧政府只肯就「加辣難、減辣易」機制口頭承諾，唔肯正式修例，一度揚言會喺草案三讀時投反對票。泛民當時嘅如意算盤係，一旦佢哋集體坐定定喺會議廳投反對票，港府同西環只好被迫氹掂反對草案嘅建制派議員「轉軚」，咁樣草案可通過，泛民可「又食又拎」，不過當日有份幫手拉票嘅官員透露，泛民其實計錯數，結果一度充大頭鬼反對後，最後又知自己玩唔起，被迫「轉軚再轉軚」，改為集體離場抗議，任由草案以大比數通過，乜面都冇晒喇！

其實，鬍鬚曾近日都好冇面，自佢恐嚇話港府七年後會有財赤後，唔信佢嘅人就提出各種質疑，甚至本報獲悉政府研究減辣部署後，鬍鬚曾都要捻鬚亂兜一通，真係信佢至奇！

第一手消息請下載on.cc東網iPhone/iPad/Android/Windows Phone Apps