政壇：英國讀書霍啟山愛上足球
多位球壇名人尋日聚頭，包括有「金牌教練」之稱嘅資深足球教練盧德權、前足球先生山度士及著名足球評述員何鑑江。熱愛足球嘅香港小型足球總會會長霍啟山，亦專程由南沙回港出席聚會，期間啟山及山度士不時撩只得十二歲嘅球壇未來新星劉家喬傾偈。會後，啟山急急腳走人，話約咗朋友落場踢波，可見佢對足球嘅熱誠確係百分之百。
山度士（左起）與霍啟山齊齊引劉家喬傾偈，但小朋友好怕醜。
啟山話，佢細個喺英國讀書，受當地熾熱嘅足球風氣耳濡目染，自然就愛上足球運動。講起備受全球球迷矚目嘅世界盃賽事將於六月喺巴西舉行，啟山話，到時一定會親身去參與呢項國際盛事。佢話，今年咁啱係香港足球總會成立一百周年，到時配合一連串推廣活動，相信將掀起一陣足球熱潮。咁佢會唔會向姪仔，即係佢哥哥啟剛嘅寶貝兒子傳授足球技巧？啟山笑笑口話，姪仔年紀太細喇！佢都希望姪仔快高長大，將來齊齊落球場玩。
