新界鄉議局同賽馬會推出全新嘅鄉郊長者探訪計劃，安排馬會義工走訪全港七百多條村，探訪獨居長者。馬會行政總裁應家柏尋日專登入元朗新田探訪，鄉議局副主席林偉強同新田鄉事委員會主席文志雙齊齊做導遊，點知期間出現雞同鴨講事件，究竟發生咩事呢？

應家柏（右）聽到婆婆講「釘橋」，笑得好開心。（受訪者提供）

話說德國人應家柏入村後，好有誠意咁專登用廣東話同啲老人家打招呼，例如講早晨，見到有位婆婆手上戴住條仿水晶手鏈，就出招冧婆婆，大讚「好靚」，點知婆婆就用英文回覆話：「釘橋（Thank you）」。原來婆婆曾經喺英國住過二十年，仔女同孫仔都移晒去外國，所以咪識講英文囉！應家柏今次真係轉錯晒頻道喇！

應家柏又參觀被譽為全港最華麗歷史建築之一嘅「大夫第」，睇吓嗰度嘅古代灶頭同古老建築，連茅廁都睇埋。唔知係咪因為馬會有份捐錢修葺，所以佢零舍有興趣呢？

第一手消息請下載on.cc東網iPhone/iPad/Android/Windows Phone Apps