食物及衞生局局長高永文近排身體抱恙,聲沙咗一段時間,尋日烈日當空依然見佢抱病出席饑饉三十開幕禮,戴住遮陽帽嘅高永文不但帶頭宣讀「絕食」三十個小時嘅饑饉誓章,仲同年輕人又唱又跳,喺現場播放非洲音樂帶動下,跟住節奏咁拍打自己大髀,交足功課。

高永文(左)抱病出席饑饉三十活動。

高永文自從上次立法會開特別財委會,連續講咗三、四個鐘頭之後,就失晒聲。雖然近日好番啲,但係講嘢仍然陰聲細氣,睇落仲清減咗。咁佢真係要禁食三十小時?高永文就話,期間會食流質嘢嘅。奉勸高醫生如果真係要「絕食」,千祈要小心身體呀!

第一手消息請下載on.cc東網iPhone/iPad/Android/Windows Phone Apps