政壇：白鴿黨許智峰犯眾憎
白鴿黨呢輪頭頭碰着黑，前主席何俊仁因議會瀏覽艷照成為紅人，另一位「紅人」就係中西區區議員許智峰，呢位「紅人」因為響議會玩嘢，搞到無人敢埋身，會中人同區議會嘅相關人士都有唔少睇法，有人指佢作風實在太瘋狂，唔妥佢嘅除咗建制派外，連區內幾位泛民議員都覺得許智峰玩得太過火。
設計圖片及對白
想打尖參選立法會？
上個月初，許智峰抗議區議會撥款二十五萬元畀地區團體推廣《基本法》，但因爭拗而被抬走，期間又同保安推撞、又搞出召警一事，從此佢言行出晒位，幾乎日日都諗計出擊、博出鏡，迅即成為中西區「紅人」。最大鑊係政府擺明唔幫佢，結果由中西區民政事務專員、到泛民戰友，甚至保安叔叔，個個都怕咗佢，差在未見到佢就彈，要幾神憎鬼厭先達到呢個境界呢？
唔少政壇中人話，許智峰質疑撥款涉嫌利益輸送係無錯，但係佢有千千萬萬條路行，偏偏揀咗一條最無理取鬧嘅方式，結果連區內白鴿黨議員如甘乃威、黃堅成都冷眼旁觀。
剝花生睇好戲嘅口痕友就話，現時白鴿黨唔少人排緊隊出選港島區立法會議席，包括南區區議員柴文瀚，另一位南區區議員羅健熙就劍指超級議席。
許智峰急住博出位，唔通佢係想打尖參選立法會？
