教育步向商品化 羊毛出自羊身上
內地嘅「希望工程」家喻戶曉，皆因呢個公益項目可以造福學生，畀窮家孩子獲得讀書機會。咁香港係咪亦需要搞希望工程呢？表面上係唔需要嘅，香港暫時不至於有人冇書讀，不過咁，隨着教育愈來愈向錢看，連幼稚園都商品化，日後可能需要希望工程都唔定o架。
呢，天水圍德怡中英文幼稚園「被結業」咪就係例子囉。呢間已經有二十一年歷史嘅老牌幼稚園由於不獲續租，下學年面臨停辦危機，事件除咗反映幼稚園被搶校舍嘅悲哀，亦揭露承租校舍嘅另一間幼稚園涉嫌未註冊就偷步收生，搞到家長無所適從，徬徨不已。教育局局長吳克儉係咁講，有關校舍未註冊前不可取錄學生，下月一日面試收生之前亦唔可以收取留位費之外嘅費用。而該幼稚園就否認偷步收生，仲強調學費及雜費同舊校相差唔遠，就算增加，加幅亦唔會超過百分之五。
其實，有冇偷步收生都係其次，學校唯利是圖，最多被人批評其身不正啫，最令人擔心嘅係，幼稚園搶高租金，羊毛出自羊身上，呢啲成本遲早要轉嫁畀學生，學費水漲船高，隨時搞到有人冇書讀o架！
唔係太一叮杞人憂天，正如幼兒教育人士話齋，今次事件係第一次有教育團體以貴租搶奪人哋嘅校舍來擴張版圖，反映行內生態已經扭曲，教育步向商品化，隨時造成惡性競爭，以後仲係咪有教無類，就好難講咯。呢嗱，喺一片加租狂潮之下，「被結業」嘅點止德怡幼稚園吖，兩間位於元朗錦綉花園嘅幼稚園近日亦因為不獲續租而需搬遷或停辦，幾百名學生慘成人球，唔徬徨就假。
退一步講吖，幼稚園捲起搶奪校舍歪風，如果其他業主有樣學樣飛擒大咬，辦學團體就算唔使執笠，亦要用大部分學費餵養租金巨獸，教學質素點可能唔受影響吖。今日香港地產獨大，百業凋敝，家陣連幼稚園學生都冇運行，講起真係可悲。
講來講去，都係前朝政府種嘅禍。當年貪曾好大喜功，將教育列為六大產業之一，將作育英才嘅教育事業變成作育錢財嘅謀利生意，結果教育唔止產業化，更加銅臭化、劣質化。高等院校濫開副學士課程，將學生當成提款機；名牌中小學紛紛轉直資，大搞貴族教育；家陣連幼稚園都淪為弱肉強食嘅殘酷森林，學生淪為人球，再咁落去，教育遲早變成有錢人嘅專利。
睇嚟香港真係需要希望工程，不過最需要接受教育嘅係嗰班失職官僚，叮！
