SUN搞作：打橫嚟講：上海密室談判團

做得立法會議員，額上刺青就是刻寫「政治人物」三隻大字，一言一行，不只向選民交代，還須得有政治智慧。

中央官吏搭個雞棚，擺個擂台，理所當然係個有蕉皮的屎氹啦！喺專政世界裏，點會有咁好死的鮑魚宴九大簋等你哋嚟食吖？蕉就有！

明知山有虎，偏向虎山行，是大英雄所為，之不過，絕非政治娃娃想像中的歡樂天地呀！自以為是再世哥利亞，唔該照吓塊鏡先啦！

北上泛民團內，確有真心愛港，藉機表達港人對普選要求的港人代表，但千祈咪話畀我知，你唔知隊中有宄（音「鬼」，內奸也）！嗱！本人並非在此挑撥，而係叫啲「賴依芙」嘅人唔好「豬上腦」啫！

泛民團員被挾上轎，戲子就做硬的了！但不要自塗白粉在鼻尖便是！

民建聯的頭領，隻隻喜孜孜地撲出來說，不介意讓出時間，給泛民團「單獨」會見「領導人」咁話，哼！一棚無自己思想的奴才，唔係接獲「聖諭」，佢哋會咁順攤，讓出受寵幸的時間？那即係人家已裝定彈弓，一切就緒，等你埋位的了！OK! Are You Ready?

仲有，泛民團弟兄，你哋要求「單獨」會見，請問會否堅持錄音錄影作毫無刪剪的直播，或回港足本放映？好等我哋知道你為港人爭取過乜吖？否則，咪又一次「密室談判」？

最後，要在此提一提，凡任何政治談判，對壘雙方的地位，應該是大家咁高咁大對等的，今次中共的代表，只派個比香港特首職級還要低的人，頂多是個帶口信的信差，同佢哋認真？不如去城隍廟食灌湯餃算吧！記得買手信畀老婆呀！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府