城中鏡：小米熱爆半日賣130萬部
內地手機小米行銷有法，領軍者雷軍更係創意無限，啱啱過去嘅四月八號係小米自訂嘅「米粉節」，雖然小米冇推出新產品，但當日都喺短短12小時內賣咗130萬部機，成交超過15億元（人民幣），單係配件都賣咗過億元人仔！其實當日下晝四點，網上訂機已經打破咗小米嘅銷售紀錄，雷軍今次真係有排心情靚。
剛結束嘅米粉節激銷百幾萬部手機，雷軍真係飲得杯落。（資料圖片）
米粉節當日，開場10分鐘網站流量已達1,500萬人次，15分鐘，50萬部手機已賣晒！到咗20分鐘，支付金額已過億元！每分鐘戰報再次顯示內地電子商貿嘅威力。其實，小米喺港台都有好多擁躉，當日香港同台灣兩地加埋賣嘅小米手機都超過10萬部，佔大陸銷售量嘅一成。交出咁嘅成績，小米員工非常振奮，國產手機又威一次。
