城中鏡：盧偉國夫唱婦隨
中文大學逸夫書院早前舉行粵曲籌款晚會，立法會議員盧偉國（WK）同前馬會主席陳祖澤（John）都去一展歌喉，WK同太太黃少珍拍住合唱諧趣粵曲《綽頭王》，唱腔鬼馬，帶動全場歡樂氣氛。逸夫書院院長陳志輝（Andrew）都唱埋一份，出台前幾日，佢因感冒菌來襲，突然失聲，好彩服用中藥加上瞓飽覺養足精神，三日極速恢復八成功力，總算冇失場。
盧偉國（右）好貪靚，演出前半個鐘極速剃鬚換衫。左為盧太黃少珍。
粵劇名伶譚倩紅（右）同逸夫書院芳艷芬藝術傳承計劃研究員李佩珊（左）齊粉墨登場。
陳祖澤（左）同陳志輝（右）首次同台演出。
籌款晚會由逸夫書院同音樂系粵劇研究計劃合辦，Andrew搵嚟阿John合唱一曲《合兵破曹》，兩位都係資深唱將，歌齡長達二十年，出台前夾番兩次就搞掂。不過Andrew自爆話，演出前幾日突然無晒聲，表演幾乎泡湯，好彩即刻服中藥救聲，又瞓飽覺養氣，當晚踏台板獻唱，觀眾都唔多覺佢把聲有咩問題。Andrew就抹一把汗，頻呼好險。
自細學聲樂識用丹田
阿John近年致力推廣英文粵曲，前晚大唱中文粵曲一樣駕輕就熟。佢話秘訣係每個禮拜堅持練歌，仲要緊記出台前三日戒食煎炸同辣嘢。阿John自爆曾有唔少蝦碌經歷，有次表演英文粵曲時着住對鞋太高，拗柴失平衡，好彩拍檔快手扶住，先至冇出醜咋！
WK咁唱得，事關佢自細學聲樂，早已掌握用丹田唱歌嘅竅門，中氣十足，八十年代又跟過王粵生學唱粵曲七年，所以練得一把好聲。盧太來頭都唔細，佢唱開女高音，曾係中大合唱團成員，上台同老公一唱一和，極啱Key。WK唔止唱得，仲精通口琴、琵琶、二胡、色士風同秦琴等，認真唔講得笑。
