設計圖片及對白
地區鄉事委員會相繼起風雲，繼屯門同廈村鄉事委員會獲當區民政處確認修章，剔除太平紳士可直入鄉委會嘅條文，坪洲鄉委會三年前亦向離島民政處申請修章，據聞該處經過多年審批後，近日先確認相關內容。相信呢個改變將對鄉議局副主席林偉強影響最大，佢或因此被踢出坪洲鄉委會。
鄉議局地位危危乎
林偉強喺一○同一一年喪失鄉委會主席、離島區議會當然議員同埋區議會主席席位後，近年都係靠新界太平紳士身份嚟做坪洲鄉委會當然議員，依家修章獲確認，換句話講，林偉強自此喺坪洲就咩都唔係！
不過，原來鄉郊仲有個規矩，就係想參加當區鄉郊代表選舉，必須喺選前喺坪洲連續居滿六年。之不過，林偉強已搬離坪洲多年，而個選舉年底就舉行，點睇佢都趕唔切。
至於佢喺鄉議局嘅地位會唔會受到影響呢？據聞鄉議局主席劉皇發近年對林偉強唔投入鄉議局工作頗為不滿，所以林偉強想平穩過渡去下屆鄉議局，真係要勤力至得嘞！
第一手消息請下載on.cc東網
