政壇：蔡敏思幫星洲男士扮靚
今時今日，貪靚已經唔再係女人嘅專利，只要睇吓依家嘅男士美容產品咁多就可知一二。開男士美容中心嘅蔡敏思（Mence）透露，佢除咗喺香港發展生意之外，正打算去新加坡開新店，擴展男士美容勢力版圖。
蔡敏思（右）出席活動時同朋友相見歡，生B之後佢一如以往咁苗條。
用自己個名嚟開舖嘅蔡敏思話，新加坡嘅男士要服兵役，同香港男士比較，可能冇咁貪靚，不過，呢一點亦係佢打算去新加坡發展嘅關鍵，佢發現正因為呢一個原因，新加坡嘅男士護膚技術冇香港咁專業，所以佢哋可以帶香港最好嘅設施過去，並以當地四十歲以上男士為目標，畀佢哋一睹成熟男士原來係可以幾咁fit同健康，唔好等到青春靜悄悄流逝，至後知後覺。
