政壇：陳淑玲復出選廠商會會長
四大商會之一嘅香港中華廠商聯合會（廠商會）今年十一月舉行換屆選舉，但年初已爆會長之爭，原本最有分量接棒嘅第一副會長陳淑玲（Shirley）一度想陪家人，而唔想上位，副會長顏吳餘英其後表態角逐會長一職，另一位副會長李秀恒隨後亦加入競逐，令會內氣氛十分詭異。不過，最新消息傳出，Shirley改變主意，決定重返競選舞台。
我哋向Shirley求證，佢承認因為得到家人及廠商會同仁支持，所以都係決定參選。佢強調，廠商會入面個個都係大老闆，個個都係叻人，最緊要大家團結、和諧同埋開心，仲話團結就係力量喎！據聞，李秀恒同顏太嘅競爭太過激烈，兩人暗中拉票令唔少會董左右為難，令到原本感情融洽嘅會董之間氣氛好詭異，有人就出動Shirley堂兄全國政協常委陳永棋游說，所以有呢個一百八十度轉彎嘅改變。
新形勢下，有說顏太已決定棄選，轉而支持Shirley；李秀恒就似乎仍未放棄，對呢個突如其來嘅變化，似乎仍然需要時間去消化。
今年年初Shirley決定棄選，主因係去年佢嘅囝囝突然因為突發心律失常死亡綜合症（SADS）而離世，事件令Shirley心態大變，除咗想放多啲時間陪家人，仲成立咗個「遺傳性心律基金」。Shirley話，佢會繼續推廣SADS嘅工作，六月份將有個大活動宣揚有關訊息，希望加強大家嘅預防意識。
