政壇：長毛訪滬受綁難搞事
五十七位立法會議員今個禮拜六、日訪問上海，期間仲有機會同港澳辦主任王光亞同基本法委員會主任李飛討論政改問題，立法會秘書處尋日朝早為議員舉行咗茶會，簡介上海之旅，但細節都係欠奉。由於此行「長毛」梁國雄呢個滋事分子都會去，秘書處都做咗啲特別安排，將成員編為小組，又以人釘人方式睇實佢，如果可以，秘書處睇怕想搵條學行帶綁實長毛都似。
設計圖片及對白
個茶會本來係簡介上海之旅嘅細節，但巧婦難為無米炊，由於負責接待嘅上海市政府一日未公布具體行程安排，尋日都冇定出最終時間表，搞到負責講解行程嘅秘書處都唔知點講，惟有攞番幾個禮拜前由特首辦製作嘅參觀行程表，再加埋當地天氣同酒店地圖，當啲議員係鴨仔咁。
茶會冇內容 泛民失望
泛民主派見到茶會內容乜都冇，秘書處又十問九唔知，梗係唔會咁容易收貨。白鴿黨單仲偕透露，曾鈺成喺大前日已經向泛民作出溫馨提示，話到時建制派會自動消失，令中央同泛民有單獨見面嘅機會，如果上到去發現貨不對辦，下次就唔使再預佢哋。秘書處亦特意安排咗長毛同團長曾鈺成一組，呢個組一個泛民成員都冇，其餘組員包括建仔嘅蔣麗芸、工聯會嘅陳婉嫻、王國興等，秘書處似乎刻意分開佢同泛民嘅其他議員，減低戰鬥力。
不過，泛民主派至今仲係「猶抱琵琶半遮面」，唔知自己想點，至於到時建制派係以「遲到」定「早退」方式促成泛民單獨同中央嘅代表官員交流，馮檢基就爆咗句：「相信大家到時會識做。」
