特色老街消失 往事只能回味

嗱，繼灣仔「囍帖街」之後，下一條被消失嘅老街可能就係有「結婚禮服街」之稱嘅上海街喇。上世紀八十年代，上海街嘅婚嫁用品店成行成市，行幾步就有一間，可以講係其門如市，車水馬龍。而今日嘅上海街已面目全非，數數埋埋只餘下五間婚嫁用品店咁大把，簡直就係尋尋覓覓，冷冷清清。

其中一間碩果僅存嘅裙褂店老闆大吐苦水，自從太子一個大型商場開幕後，上海街人流日益稀疏，偏偏租金反其道而行，愈升愈有，搞到同業紛紛關門大吉，「結婚禮服街」早就名存實亡。最搞笑嘅係，「結婚禮服街」瀕臨消失，旅發局竟然懵然不知，繼續煞有介事喺網頁向旅客大力推介，都唔知好笑定好嬲。試諗吓，如果旅客睇到旅發局推介而專程來到上海街，一心諗住購買婚嫁用品，豈不是乘興而來，敗興而返？

講開又講吖，隨着香港特色漸漸消失，被湮沒嘅又點止「結婚禮服街」，有「古董街」之稱嘅上環荷李活道及摩羅上街同樣今非昔比。依家嘅古董街同以前根本係兩件事，專賣小古玩嘅排檔疏疏落落不在講，好多開咗幾十年嘅古董店亦敵不過租金狂漲而黯然結業。好似一間開業逾廿年嘅古董店咁吖，去年被業主加租超過兩倍，雖然最終另覓舖位經營，但月租高達廿五萬元，究竟可以頂得幾耐呢？店主話喎，好多同業頂唔順貴租而執笠，家陣條街幾乎成為連鎖咖啡店及跨國時裝店嘅天下，古董街遲早成為歷史嘅咋。

難為前朝特首曾蔭權爵士吹水唔抹嘴，提倡各區要以自身特色發展地區經濟喎。冇錯，以前香港係創業天堂，各區都有自己嘅特色，當時確係大有可為，可惜貪曾志大才疏，講完就算，所謂地區經濟純屬大隻講。呢，喺高地價、高樓價、高租金嘅「三高」政策之下，傳統店舖買少見少，剩下嘅唔係金舖就係藥房，唔係化妝品店就係影音店，千篇一律，仲邊有傳統特色可言吖。近年香港來來去去都係內地旅客，外國旅客愈來愈少，咪就係因為香港特色買少見少囉。

一句講晒，地產獨大一日唔改變，「三高」死結一日唔解開，香港漸漸失去特色，只會加速沉淪嘅咋，叮！