家陣,香港廢柴政府做親乜都總會畀人狂插的,究其原委,除因班庸廢奴才官員弱智低B無能外,就係呢個政府不得民心、無信用,令香港人心死兼憤怒!

同一笪地方,換了一面旗,相比從前,情況便截然天與地,淨睇中學會考(現叫中學文憑試),由考知識水平,變為劣質意識滲透洗腦,向赤色政治服務。

十七年來的中學會考,有邊一期唔畀人鬧爆的呢?今年,中國語文科考題,要求考生以「必要的沉默」作答,旋即,被全港知識分子狠批此乃考評局曲線迫令香港新生代做「知機縮骨的鵪鶉」。

其實,我倒看到暗陰面的另一邊,是嗰位扑錘用此題目的考官,如果仲有良知的話,佢可能明知做呢類咁喪盡天良、荼毒青少年的賤事,也「最後選擇了沉默」,就係因反抗無力,惟有將當局最卑賤的惡行醜態,顯露出來,畀全港人去看個明白。帶頭做個沉默的鵪鶉,是必要的!

香港人,實在太蠢了!你估「你們的祖國」到今日至想你哋做「沉默的鵪鶉」嗎?嗱!記唔記得貪曾煲呔一上位做特首,佢第一句話係乜呀?佢係話「要做好呢份工」呀!早早已講清楚,即使喺呢度做最高話事人,也只不過係一個「受命於上頭」嘅奴才咋!咁多嘢講?博唔撈呀?

今天香港地,見到有乜不公義、黑白顛倒、無規無矩的事,都應當睇唔到,咪多事,要息事寧人!和諧和諧嘛!

今劑呢條文憑試題,最適宜用來考政務官的!君不見佢哋全部都係一棚沉默的鵪鶉嗎?並且,用以篩選特首入閘咪好囉!搞乜鬼全民普選吖?嘥氣!

彭志銘

次文化考古學家,對城中潮語有深入研究,博徵博引,廢官廢人行埋一邊。

歡迎add我facebook一齊(目及)實政府

第一手消息請下載on.cc東網iPhone/iPad/Android/Windows Phone Apps