城中鏡：劉兆銘遊立會 笑談掟嘢
立法會周不時都有訪客，尋日老戲骨劉兆銘就應金融界議員吳亮星邀請，去咗立法會半日遊。劉兆銘做戲幾十年，喺戲中掟嘢打交都係閒事，佢點睇近年立法會部分議員有鋪掟嘢癮？佢笑笑口話，現實生活中掟嘢需要好大勇氣，同拍戲掟嘢好唔同，佢都好想同呢啲人交流吓喎！
劉兆銘笑稱好想同掟嘢議員交流。
吳亮星係金融界代表，點解帶演藝界朋友去玩呢？劉兆銘話個鴨仔團團友係鶴山同鄉會一班鄉里，佢係同鄉會會長，而吳亮星亦係鶴山人，佢哋早已相識多年。不過，尋日吳公務繁忙未有帶隊參觀晒成個立法會，但就一盡地主之誼，陪班同鄉食午飯。
行完一個圈之後，劉兆銘好客氣咁表示，今次係佢第一次參觀立法會，佢係抱住做學生嘅心態而嚟。
