城中鏡：梁詠筠捐畫行善
仁愛堂日前舉行新一屆董事局就職典禮暨晚宴，新任主席吳明珍喺前主席陳鄭玉而手中接棒，一眾政商界名人都去撐場。保安局局長黎棟國首次公開獻唱，點知唱唱吓走晒音，又跟唔上節拍，總之勁甩轆。難得佢為做善事唔怕獻醜，仲自嘲係「走音歌王」，結果話咁易幫手籌到逾二十五萬元善款，誠意十足。
蕭楚基（右）偕太太梁詠筠撐場。
副主席曹貴子（中）落力籌款，獲創會主席劉皇發（左）及陳鄭玉而（右）頒發紀念獎盃。
黎棟國（右）同吳明珍獻唱，將晚宴氣氛推向高潮。
黎棟國為做善事獻出自己嘅第一次，同吳明珍合唱《相思風雨中》。正當台下一眾賓客準備洗耳恭聽時，點知佢唱到走晒音，又甩拍子，後來連播放伴唱音樂嘅音響都停埋添！不過唔緊要，佢哋一於少理繼續唱，氹得全場勁開心。
前主席蕭楚基嘅太太梁詠筠亦唔執輸，捐咗兩幅自己畫嘅國畫幫手籌到十萬元。蕭太話，佢同前保安局局長李少光嘅太太一樣鍾意畫畫，所以李太就介紹佢一齊跟名畫家學藝。佢話自己鍾意畫花草樹木，因為人像嘅比例較難捉摸喎！
吳明珍做好教育醫療
場中仲有今屆退出董事局嘅前總理蔡陳淑儀，佢悉心打扮出席，仲專誠搵朋友訂造咗睇落似黑水晶嘅「墨翠」頸鏈、耳環同戒指，明明係黑色嘅首飾，一拎起手就變成通透嘅綠色翡翠，好特別。
吳明珍就話，接任後將集中火力做好教育同醫療工作，包括帶領學生前往極地及亞馬遜等地考察，同埋舉辦父、母親節籌款活動。做咗主席後預咗少啲時間陪屋企人，佢話丈夫陳榮濂同囡囡都好體諒。至於落莊嘅陳鄭玉而終於可以放長假，打算四至六月去上海、越南及加拿大鬆一鬆。
